(www.panoornews.in)തലശേരി ജൂബിലി റോഡിൽ കാന്തലോട്ട് പള്ളിക്ക് സമീപമുള്ള പണിതീരാത്ത കെട്ടിടത്തിനുള്ളിൽ നിന്നും തലയോട്ടിയും സ്ത്രീ വസ്ത്രങ്ങളും കണ്ടെത്തിയതിലെ ദുരൂഹത ഒഴിവാക്കാൻ തലശ്ശേരി പോലീസ് ശാസ്ത്രീയ അന്വേഷണം തുടങ്ങി. കണ്ണൂരിൽ നിന്ന് പോലിസ് നായയും വിരലടയാള വിദഗ്ദരും സ്ഥലത്തെത്തി തെളിവുകൾ ശേഖരിച്ചു.
ജില്ലാ പോലീസ് ചീഫ് നിധിൻ രാജ് ഐ.പി.എസ്, തലശ്ശേരി എ.എസ്.പി. പി.ബി. കിരൺ ഐ.പി.എസ് തുടങ്ങിജില്ലയിലെഉയർന്ന ഉദ്യോഗസ്ഥർ സംഭവ സ്ഥലം സന്ദർശിച്ചു. ഇന്നലെ വൈകിട്ടാണ് തലയോട്ടിയുടെ ഭാഗം പൊലീസ് കണ്ടെടുത്തത്. തമിഴ്നാട്ടുകാരിയായ വയോധികയെ കാണാനില്ലെന്ന പരാതി കേന്ദ്രീകരിച്ചും അന്വേഷണം നടത്തുന്നുണ്ട്.
ഇവരുടെ സേലം ആത്തൂർ സ്വദേശിനിയായ മകളുടെ പരാതിയിൽ നടത്തിയ അന്വേഷണത്തിലാണ് പോലീസ് അസ്ഥികൂടം കണ്ടെത്തിയത്. പഴയങ്ങാടി ടാക്കീസിന് സമീപം താമസിച്ചിരുന്ന മാതാവ് ധനകോടി (73)യെ കാണാതായതുമായി ബന്ധപ്പെട്ട് പിതാവ് അമ്പായിരത്തെ സംശയിക്കുന്നതായി മകൾ പരാതി നൽകിയിരുന്നു.
തുടർന്ന് നടത്തിയ അന്വേഷണത്തിലാണ് തലശ്ശേരിയിലെ ഗ്രാൻഡ് തേജസ് വസ്ത്രാലയത്തിന് സമീപം നിർമ്മാണത്തിലിരിക്കുന്ന കെട്ടിടത്തിനകത്തെ കുഴിയിൽ നിന്ന് ധനകോടിയുടേതെന്ന് സംശയിക്കുന്ന തലയോട്ടിയും സാരിയും കണ്ടെത്തിയത്. തലയോട്ടിക്ക് അഞ്ചോ ആറോ മാസം പഴക്കമുണ്ടെന്നാണ് സൂചന. പൊലീസ് അമ്പായിരത്തെ കസ്റ്റഡിയിലെടുത്ത് ചോദ്യം ചെയ്തു വരികയാണ്.
Skull and bones found in Thalassery; The deceased is suspected to be a Tamil Nadu native, her husband is in custody
