ചൊക്ലി: (www.panoornews.in)ഒരു കാലത്ത് വിമാനത്തെ ആകാശത്ത് പറക്കുന്നത് കണ്ടു മാത്രമറിയുന്ന അമ്മമാർക്ക് ജീവിതത്തിലെ വലിയൊരു സ്വപ്നസാക്ഷാത്കാര നിമിഷമാണ് മേനപ്രത്തെ ആണ്ടിപീടികയിൽ പ്രവർത്തിക്കുന്ന അമരെന്തൻ ക്ലബ് സമ്മാനിച്ചത്. “സ്വപ്നങ്ങൾക്ക് ചിറക് നൽകി അമ്മമാർ പറന്നുയർന്നു” എന്ന പേരിൽ സംഘടിപ്പിച്ച പ്രത്യേക യാത്രാപദ്ധതിയിലൂടെ പ്രദേശത്തെ പ്രായം ചെന്ന പത്ത് അമ്മമാരാണ് ആദ്യമായി വിമാനയാത്രയുടെ അതുല്യാനുഭവം ഏറ്റുവാങ്ങിയത്.
ഇന്ന് രാവിലെ 8.35-ന്റെ വിമാനത്തിലാണ് കണ്ണൂർ വിമാനത്താവളത്തിൽ നിന്ന് അമ്മമാർ കൊച്ചിയിലേക്ക് യാത്ര തിരിച്ചത്. യാത്രയയപ്പിനായി അമ്മമാരുടെ കുടുംബാംഗങ്ങളും നാട്ടുകാരും ക്ലബ് പ്രവർത്തകരും വലിയ ആവേശത്തോടെ വിമാനത്താവളത്തിൽ എത്തിയിരുന്നു. സ്നേഹവും സന്തോഷവും നിറഞ്ഞ അന്തരീക്ഷത്തിലായിരുന്നു യാത്രയുടെ തുടക്കം.
പാനൂർ ബ്ലോക്ക് പഞ്ചായത്ത് പ്രസിഡന്റ് എൻ. പ്രസീത യാത്ര ഫ്ളാഗ് ഓഫ് ചെയ്തു. തുടർന്ന് ക്ലബ് ഭാരവാഹികൾ ബൊക്ക നൽകി അമ്മമാരെ ആദരിച്ചു യാത്രയയച്ചു. ജീവിതത്തിൽ ആദ്യമായി വിമാനത്തിൽ കയറുന്ന സന്തോഷവും ആവേശവും അമ്മമാരുടെ മുഖത്ത് വ്യക്തമായിരുന്നു.
രാവിലെ 9.35-ന് സംഘം കൊച്ചി വിമാനത്താവളത്തിലെത്തി. അവിടെ സീനിയർ സിറ്റിസൺ അംഗങ്ങളും കുട്ടികളും ക്ലബ് പ്രവർത്തകരും ചേർന്ന് ഹൃദയപൂർവ്വമായ സ്വീകരണം നൽകി. തുടർന്ന് കൊച്ചിയിലെ വിവിധ വിനോദകേന്ദ്രങ്ങളിലേക്കും സന്ദർശന പരിപാടികൾ സംഘടിപ്പിച്ചു. മെട്രോ റെയിൽ യാത്ര, ലുലു മാൾ സന്ദർശനം, കപ്പൽയാത്ര തുടങ്ങിയവയും അമ്മമാർക്ക് പുതുമയേറിയ അനുഭവങ്ങളായി മാറി. യാത്ര അവസാനിപ്പിച്ച് വന്ദേഭാരത് ട്രെയിനിലൂടെയാണ് സംഘം നാട്ടിലേക്ക് മടങ്ങുക.
സാമൂഹ്യ-സാംസ്കാരിക-സന്നദ്ധ പ്രവർത്തനങ്ങളിൽ സജീവ സാന്നിധ്യമായ അമരെന്തൻ ക്ലബ് കഴിഞ്ഞ നാല് വർഷമായി പ്രദേശത്ത് മാതൃകാപരമായ ഇടപെടലുകളാണ് നടത്തിവരുന്നത്. 2023-ൽ രൂപീകരിക്കപ്പെട്ട ക്ലബ്ബിന്റെ പ്രധാന ലക്ഷ്യം പ്രദേശത്ത് ഒരു പൊതു മൈതാനം യാഥാർത്ഥ്യമാക്കി പൊതുജന കൂട്ടായ്മ ശക്തിപ്പെടുത്തുക എന്നതായിരുന്നു.
ഇതിനായി പ്രദേശത്ത് ആവശ്യമായ 30 സെന്റ് സ്ഥലം കണ്ടെത്തി അത് സ്വന്തമാക്കാനുള്ള പ്രവർത്തനങ്ങളാണ് ക്ലബ് ഏറ്റെടുത്തത്. ജനങ്ങളുടെ സഹകരണത്തോടെ വിവിധ രീതികളിൽ ഫണ്ട് സമാഹരിച്ചുവരികയാണ്. അച്ചാർ ചലഞ്ച്, ബിരിയാണി ചലഞ്ച്, സമ്മാനപദ്ധതി കുറികൾ തുടങ്ങിയ വ്യത്യസ്ത ക്യാംപെയ്നുകളിലൂടെ ഇതിനകം ഏകദേശം 20 ലക്ഷം രൂപ സമാഹരിക്കാൻ ക്ലബ്ബിന് സാധിച്ചു.
അടുത്ത ആറുമാസത്തിനകം ബാക്കി തുകയും കണ്ടെത്തി പൊതുമൈതാനം യാഥാർത്ഥ്യമാക്കുകയെന്ന ലക്ഷ്യത്തോടെ പ്രവർത്തനങ്ങൾ ശക്തമായി മുന്നോട്ട് കൊണ്ടുപോകുകയാണെന്ന് ക്ലബ് ഭാരവാഹികൾ അറിയിച്ചു.
സാധാരണക്കാരായ അമ്മമാരുടെ ജീവിതത്തിൽ മറക്കാനാവാത്തൊരു സന്തോഷ നിമിഷം സമ്മാനിച്ചതിലൂടെ അമരെന്തൻ ക്ലബ് നാട്ടുകാർക്കിടയിൽ വീണ്ടും ശ്രദ്ധനേടുകയാണ്.
Mothers took flight by giving wings to their dreams; Amarenthan Club in Chokli presents an unforgettable experience through sky travel
