(www.panoornews.in)മുഖ്യമന്ത്രി വി.ഡി. സതീശനെ സമൂഹമാധ്യമങ്ങളിലൂടെ അപമാനിച്ചെന്ന പരാതിയെ തുടർന്ന് ആറ്റിങ്ങൽ ഗവൺമെന്റ് ബോയ്സ് ഹയർ സെക്കൻഡറി സ്കൂൾ പ്രിൻസിപ്പൽ ജവാദ് സുബൈറിനെ പൊതുവിദ്യാഭ്യാസ വകുപ്പ് സസ്പെൻഡ് ചെയ്തു. സംഭവത്തിൽ മുൻപ് രജിസ്റ്റർ ചെയ്ത പരാതിയും പ്രാഥമിക അന്വേഷണ റിപ്പോർട്ടും പരിഗണിച്ചാണ് നടപടി.
ആറ്റിങ്ങൽ ഗവ. ബോയ്സ് ഹയർ സെക്കൻഡറി സ്കൂളിലെ പ്രിൻസിപ്പലും പൊതുവിദ്യാഭ്യാസ സംരക്ഷണ യജ്ഞത്തിന്റെ തിരുവനന്തപുരം ജില്ലാ മുൻ കോ-ഓർഡിനേറ്ററുമായ ജവാദ് സുബൈറിനെതിരെയാണ് നടപടി സ്വീകരിച്ചിരിക്കുന്നത്. മുഖ്യമന്ത്രിക്കെതിരെ സാമൂഹിക മാധ്യമമായ ഫേസ്ബുക്കിൽ അപകീർത്തികരമായ പരാമർശങ്ങൾ നടത്തിയെന്നായിരുന്നു പരാതി.
സംഭവവുമായി ബന്ധപ്പെട്ട് യൂത്ത് കോൺഗ്രസ് നൽകിയ പരാതിയുടെ അടിസ്ഥാനത്തിൽ അധ്യാപകനെതിരെ നേരത്തേ പൊലീസ് കേസെടുത്തിരുന്നു. തുടർന്ന് പൊതുവിദ്യാഭ്യാസ വകുപ്പ് വിശദീകരണം തേടുകയും ശക്തമായ അച്ചടക്ക നടപടി സ്വീകരിക്കുമെന്ന് അറിയിക്കുകയും ചെയ്തിരുന്നു.
ഈ മാസം 31-ന് സർവീസിൽ നിന്ന് വിരമിക്കാനിരിക്കെയാണ് ജവാദ് സുബൈറിനെതിരായ സസ്പെൻഷൻ നടപടി വന്നിരിക്കുന്നത്. വിരമിക്കൽ തീയതിക്ക് ഒരു ദിവസം മാത്രം ബാക്കിയുള്ള സാഹചര്യത്തിൽ എടുത്ത നടപടി വിദ്യാഭ്യാസ രംഗത്തും രാഷ്ട്രീയ വൃത്തങ്ങളിലും ചർച്ചയായിട്ടുണ്ട്.
സർക്കാർ ജീവനക്കാരുടെ പെരുമാറ്റച്ചട്ടം ലംഘിച്ചോയെന്നതടക്കമുള്ള കാര്യങ്ങൾ വിശദമായി പരിശോധിച്ച ശേഷമാണ് നടപടി സ്വീകരിച്ചതെന്നാണ് വിദ്യാഭ്യാസ വകുപ്പ് വൃത്തങ്ങൾ വ്യക്തമാക്കുന്നത്. വിഷയത്തിൽ തുടർ വകുപ്പുതല നടപടികളും ഉണ്ടായേക്കുമെന്നാണ് സൂചന.
Content Highlight: Facebook post against CM controversial; Attingal school principal suspended as he is set to retire tomorrow
