ചമ്പാട് എൽപി സ്കൂളിന്റെ സമഗ്ര വികസനത്തിന് പിടിഎയുടെയും നാട്ടുകാരുടെയും പിന്തുണ

പന്ന്യന്നൂർ: ചമ്പാട് എൽപി സ്കൂളിൽ വെച്ച് പിടിഎ ജനറൽ ബോഡി യോഗം സംഘടിപ്പിച്ചു.പന്ന്യന്നൂർ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ കെ.പി ലീല ടീച്ചർ യോഗം ഉദ്ഘാടനം ചെയ്തു. സ്കൂളിന്റെ സമഗ്ര വികസനത്തിന് പിടിഎയുടെയും നാട്ടുകാരുടെയും പിന്തുണ അനിവാര്യമാണെന്ന് അവർ പറഞ്ഞു. വിദ്യാഭ്യാസത്തിന്റെ ഗുണനിലവാരം ഉയർത്തുന്നതിൽ അധ്യാപകരും രക്ഷിതാക്കളും ഒരുപോലെ കൈകോർക്കണമെന്നും അവർ അഭ്യർത്ഥിച്ചു.

വാർഡ് അംഗം എം.പി രജനി അധ്യക്ഷത വഹിച്ച ചടങ്ങിൽ പിടിഎ പ്രസിഡന്റ് കെ.പി ശശിധരൻ റിപ്പോർട്ട് അവതരിപ്പിച്ചു. വാർഡ് അംഗവും പിടിഎ വൈസ് പ്രസിഡന്റുമായ നസീർ ഇടവലത്ത്, മുൻ പ്രധാന അധ്യാപകരായ എം. ജയകൃഷ്ണൻ, സി.കെ ശശിധരൻ, മാനേജർ പ്രതിനിധി റിസ്ബാന എന്നിവർ ആശംസകൾ അർപ്പിച്ച് സംസാരിച്ചു.

സ്കൂളിലെ അക്കാദമികവും ഭൗതികവുമായ പുരോഗതികൾ യോഗത്തിൽ വിലയിരുത്തി. വരും വർഷത്തെ പ്രവർത്തനങ്ങൾക്ക് പുതിയ കമ്മിറ്റിയെ തെരഞ്ഞെടുക്കുകയും ചെയ്തു.

ചടങ്ങിൽ ഈ വർഷത്തെ എൽഎസ്എസ് പരീക്ഷയിൽ വിജയിച്ച കുട്ടികളെയും ഉന്നത വിജയം നേടിയ വിദ്യാർത്ഥികളെയും പൊന്നാട അണിയിച്ച് അനുമോദിച്ചു. പ്രധാനാധ്യാപിക ടി. ബുഷ്റ സ്വാഗതവും സ്റ്റാഫ് സെക്രട്ടറി സാജിറ നന്ദിയും പറഞ്ഞു.

Content Highlight: Chambad LP School PTA General Body Meeting Held, Toppers Honored

#Chambad LP School #PTA Meeting #Panniyannur #LSS Winners